coretan untuk mamak #6

Ma, mangngapa unamiki?

Mudah-mudahan Malaga-laga unaki. Susi bang unapa dikka’na tee ma. La’bimi sang bulan susi bang tee. Biasa toomi mabekona ke nakutanai bangmo to pea jio samping kamara’ku kua edaparaka mumangjama. Biasa to’na na kutanai bapak kos susi jio tapi kukua bangra ka mangtajan unapa’. Ambai ala kupikkiri tonganmira kua apara to bisa kujama danggi kususi bang tee. Marossomo susi bang tee eda lalo apa dijama.

Peta’da doangan bangmo dikka’na ma, na malomo-lomo lalangku sanga anna kususi bang kua yato apa kukadoangngi aja sussa kuampa. Ambai buda toomi dosaku inde’ main a masussa bangmi to apa kuampa. Tapi tatta’na ala sabbara sanga inda na diissen to apa la jadi ke te’da na den sabbara. Ya’ke bangmo susi bangna tee jolo daripada ke pole omo na bambong unara susi unari.

Ma, ya tee mai pea sang kosku rata-rata mangjama ngasan jaji yanna makale’mo messun ngasanmi male mang jama na aku mandamora jio bang kos. Matumbade dikka’na kusa’ding ma, tapi na bua’piraka ia na bucakna kua ala mangngapara tee. Den too ia tee mai pira to mane kuliah sang kosku. Tapi yato disukkurutan unapa sanga den unapa apa to ala dikande jadi te’da una na den sussai tau. Sukkuru’ toona sanga mangkosmu edamo kutorro sola sampungku sanga pasti liwa’pa mabeko ke torro unapa sola sampungku na susi bang unapa tee. Aja jarang too kumale lako bolana sampungku sanga masiri’na te’damo kumangjama. InsyaAllah mangjama pole’pa ku male lako lumingka-mingka.

Ya mandara kupeta’da lako kita ta peta’da-ta’da doanganna dikkana na den unamo apa kujama sanga yanna kususi bang unapa tee, matua bangmora dau na te’da bang kareso. Biasana aku’na pikkiri’I kua padami tee umuru’ku na te’da bangpa apa bisa kubengan-benganni. Biasa toomi kukua kua apara dikkana ala kujama na kubisa bantu-bantuki ci’di.

Madoangna dikka’na mangjama sebelum mentama bulan puasa tahun tee na eda ku mabeko pole sanga yanna te’da kumangjama na kupole ke lebaranni, lewa’mo beko kusa’ding na masiri’ toomo. Male bang unamo dikka’na mendaftar-daftar tapi eda bangpira iya diampa. Biasami na tambaiki tes tapi te’da kululus biasa toomi te’da lalo na ditambaina tes. Yake makale omi bucak omo apa omora ala kujama sanga mariwang omi.

Tapi mesa’ unapa dikka masalahku sanga ijasahku te’dapa na messun jio jamanku to jolo. Lunaspi ade’na to boo atas sanganku na mane bisa messuun. Ambai cappa’ bulan tee kumale urusu’I mudah-mudahan bisami kuala jadi bisamo mendaftar ke denni jio saleanan kota. Biasana mangpikkiri tiro saleanan kota tapi matumbari kaiyya na ijasahku edapa kualai. Susi unari ke dipeta’daiki ijasah asli na te’dapa ijasahku.

Kuulang-ulangi peta’dangku lako kita ma, ta peta’da doangan unamo mudah-mudahan deen unami dikka’na jamanko inde sanga susi bangmora to bambong cappu inde mai ke susi bangna tee tapi tatta’na dikka’na sukkurutani sola sabbaratanni sanga ala diapa mira na susi memangmi tee

lelaki pendoa

Ma, tatta’ki masannang sannga katuanta' inde lino memang massannang riki iya.

Jojoran 3/61

12’3’14